درایت خان (عبد اللہ)

درایت خان کا اصلی نام عبد اللہ تھا؛ وہ کفایت خان کے بیٹے اور اپنے والد کی طرح مغل دربار سے وابستہ تھے۔ شکستہ کی تعلیم انہوں نے اپنے والد سے حاصل کی اور پھر مشق سے ایک خاص طرز ایجاد کی جسے «درایت خانی» کہتے تھے۔ ¹

«تاریخِ خط و خطاطین» کے مطابق اساتذۂ فن کا اتفاق ہے کہ وہ اپنے والد سے بڑھ کر لکھتے تھے، اور «تذکرۂ خوش نویسان» کے مصنف غلام محمد نے ان کی اس قدر تعریف کی کہ اگر میر علی تبریزی زندہ ہوتے اور درایت خان کا خط دیکھ لیتے تو اپنا خطِ نستعلیق بھول جاتے۔ ان کے خط کا نمونہ «بیاضِ بختاور خان» میں موجود ہے۔ ¹